ఇన్‌స్టాగ్రామ్‌లో మనమే తోపులం.. మోదీతో మెలోనీ సరదా వ్యాఖ్యలు

ఫ్రాన్స్‌లో జరుగుతున్న G7 సదస్సు వేదికగా భారత ప్రధాని నరేంద్ర మోదీ, ఇటలీ ప్రధాని జార్జియా మెలోనీ మధ్య ఆసక్తికర సంభాషణ చోటుచేసుకుంది. దీంతో సోషల్ మీడియాలో వారిద్దరి పేర్లతో ముడిపడిన 'మెలోడి' ట్రెండ్ మరోసారి తెరపైకి వచ్చింది. ఇన్‌స్టాగ్రామ్‌లో మనమే అత్యంత ఫేమస్ అంటూ మెలోనీ చేసిన సరదా వ్యాఖ్య ఇప్పుడు వైరల్‌గా మారింది.

G7 సదస్సులో భాగంగా నేతలంతా సంప్రదాయంగా 'ఫ్యామిలీ ఫోటో' కోసం సమావేశమయ్యారు. ఈ సందర్భంగా మోదీని కలిసిన మెలోనీ.. "మిమ్మల్ని మళ్లీ కలవడం సంతోషంగా ఉంది" అని పలకరించారు. దీనికి ప్రధాని మోదీ తమ ఆన్‌లైన్ పాప్యులారిటీని ఉద్దేశిస్తూ సరదాగా బదులిచ్చారు. దీంతో మెలోనీ నవ్వుతూ.. "అవును, మనం ఇన్‌స్టాగ్రామ్‌లో చాలా ఫేమస్" అని అన్నారు. ఈ సరదా సంభాషణకు సంబంధించిన వీడియో సోషల్ మీడియాలో విస్తృతంగా చక్కర్లు కొడుతోంది.

గతంలో రోమ్‌లో జరిగిన సమావేశంలో మోదీ.. మెలోనీకి 'మెలోడీ' చాక్లెట్ల ప్యాకెట్‌ను బహుమతిగా ఇచ్చారు. ఆ వీడియోను "హలో ఫ్రం ది మెలోడి టీమ్" అనే క్యాప్షన్‌తో మెలోనీ షేర్ చేయడంతో, అది కొన్ని గంటల్లోనే వైరల్ అయింది. నెటిజన్లు ఇద్దరి పేర్లను కలిపి 'మెలోడి' అని పిలవడం మొదలుపెట్టారు. తాజా ఘటనతో ఈ ట్రెండ్‌కు మళ్లీ జీవం వచ్చినట్టయింది.

ప్రపంచ ఆర్థిక వృద్ధి, అంతర్జాతీయ భాగస్వామ్యాలు వంటి కీలక అంశాలపై చర్చించేందుకు ఫ్రాన్స్ G7 సదస్సును నిర్వహిస్తోంది. ఈ సదస్సుకు ప్రధాని మోదీ ప్రత్యేక అతిథిగా హాజరయ్యారు. అంతర్జాతీయ వేదికలపై ఇలాంటి స్నేహపూర్వక సంభాషణలు దౌత్య సంబంధాలకు మానవీయ కోణాన్ని జోడిస్తాయని నెటిజన్లు కామెంట్లు చేస్తున్నారు.